Jól í skókassa

Í tilefni vinavikunnar í síðustu viku, þá tóku nemendur og foreldrar 5. og 6. bekkjar í Sjálandsskóla þátt í verkefninu „Jól í skókassa“. Verkefnið er alþjóðlegt og felst í því að fá börn jafnt sem fullorðna til þess að gleðja önnur börn sem lifa við fátækt, sjúkdóma og erfiðleika með því að gefa þeim jólagjafir.

Gjafirnar eru settar í skókassa og til þess að tryggja að öll börnin fái svipaða jólagjöf er mælst til þess að ákveðnir hlutir séu í hverjum kassa. Að þessu sinni verða gjafirnar sendar til Úkraínu á munaðarleysingjaheimili þar, á barnaspítala og til einstæðra mæðra sem búa við sára fátækt.

Verkefnið er á vegum KFUM og KFUK á Íslandi og fóru nemendur með gjafirnar í húsakynni þeirra síðastliðinn fimmtudag. Fróðlegt var að kynnast starfseminni í kringum þetta verkefni og fengu nemendur að skoða skemmtilega „jólasveinaverkstæðið“, setja pakkana undir jólatréð, gæða sér á piparkökum, hlusta á kynningu á verkefninu og skoða myndir af börnum sem hafa fengið jólagjafir frá Íslandi.

Frábært og gefandi verkefni sem tókst afar vel og gladdi nemendur og fjölskyldur þeirra.

Myndir frá verkefninu